Skiweekend im März 2022 idä Flumsi

Erfreulicherwies händ mir das Jahr ohni Beschränkige dörfe id Flumsi fahre, wie immer mitem Palitabus am Fritig Namitag. Am 4i simmer acho und händ als ersts grad es Plättli gnosse. Am Abig häts dänn wieder es feins Fondue gä, es Jässli, chli Schnupf und en Schlumi.

Am Samstig isches traumhafts Wätter gsi, d’Ski- und Snöberfahrer sind ab uf Pischte und Fuessgänger händ sich uf dä Fuessmarsch gmacht.

Zum z’Mittag hämmer eus idä Prodalp troffe, womer nachem Ässe nu es Jässli gmacht händ. Nachem feine Nachtässe simmer id Slalomar, äntli wieder mal Party, tanze, singe, fäschte.

Am Sunntig, traumhafts Wätter! Mer sind all Mitenand is Chrüz ufe spaziert, händ zäme z’Mittag g’ässe und sind dänn gmüetlich wieder abegloffe, grutscht, gschliffe, gschliederet, es isch so luschtig gsi, mer händ eus köschtlich amüsiert 😊 dänn hämmer dune euse obligatorisch Zwätschgelutz gno und händ eus dänn uf dä Heiwäg gmacht.

Es isch es wundervolls, unbeschwerts Wucheänd ohni Ischränkige gsi, mir händs gnosse. Danke!