Skiweekend März 2025 idä Flumsi

Alle Jahre wieder… sind mir mitere grosse Truppe id Flumsi is Skiweeki, Wättermässig sind d’Ussichte sehr schlächt gsi, aber.. am Fritig isches troche bliebe😊 mer händ zäme z’Nacht gässe und sind dä id Älplibar en Schlumi go näh.

Am Samstig simmer nachem z’Morge bereits mit Sunnestrahle belohnt worde, drum isch e Truppe go skiine und snöbe und die andere go laufe. Mer hät sich zum z’Mittag idä Molseralp troffe, dänn sinds wieder uf Pischte und die andere in Maschgekamm go Schlagerparty lose, es isch traumhaft gsi.

Nachem feine Nachtässe idä Pizzeria simmer wie immer id Slalomar go Party mache, tanze, singe und fäschte.

Am Sunntig häts dänn doch afange schneie, drum hämmer eus nachem ufruume und em Apéro bereits uf dä Heiwäg gmacht, es isch e luschtigi heireis mit Eierkirsch gsi…..

Es isch es wundervolls, unbeschwerts Wucheänd gsi, mit villnä luschtige Momänt und mir händs gnosse. Danke und bis nächst Jahr.